ਪਿੰਡ ਦੀ ਸੱਥ ‘ਚੋਂ – 4

ਹਾੜ ਦੀ ਧੁੱਪ ਨੂੰ ਮੱਠੀ ਕਰਦੀ ਬਰੋਟੇ ਦੀ ਛਾਂ ਹੇਠ ਬੈਠੇ ਲੂਣ, ਘੁੱਦਾ ਅਮਲੀ , ਮੁੰਡੀ ਕਾਪੀ ਚੱਕੀ ਜਾਂਦੇ ਕਾਲਜੋਂ ਪੜ੍ਹ ਕੇ ਆਉਂਦੇ ਨੋਰਵੇ ਆਲਿਆਂ ਦੇ ਮੁੰਡੇ ਕੋਕੂ ਨੂੰ ਘੇਰ ਲਿਆ,
ਘੁੱਦਾ ਅਮਲੀ: “ਕਾਕਾ, ਬਰਨਾਲੇ ਪੜਦੇੈਂ ? ”
ਮੁੰਡੀ ਕੋਕੂ ਦੇ ਜਵਾਬ ਦੇਣ ਤੋਂ ਪਹਿਲਾਂ ਹੀ ਬੋਲ ਪਿਆ,
ਮੁੰਡੀ : ” ਆਹੋ ਬਰਨਾਲੇ ਈ ਪੜ੍ਹਦਾ , ਹੋਰ ਆਪਣੇ ਪਿੰਡ ਕੇਹੜਾ ਤੇਰਾ ਸਿਧਵਾਂ ਵੇਟ ਆਲਾ ਕਾਲਜ ਖੁੱਲ ਗਿਆ |
ਘੁੱਦਾ ਅਮਲੀ: “ਕਿੰਨਾ ਪੜ੍ਹ ਲਿਆ ਕਾਕਾ ਫੇਰ ? ”
ਕੋਕੂ : ” ਬੀ ਏ ਪੂਰੀ ਹੋਈ ਆ ਜੀ , ਪਹਿਲਾਂ IELTS ਕਰਦਾ ਸੀ, ਹੁਣ ਕਮਪੁਟਰ ਦਾ ਕੋਰਸ ਕਰਦਾਂ ”
ਲੂਣ ਜ਼ਰਦਾ ਜਿਹਾ ਮਲ ਕੇ , ਤਲੀ ‘ਤੇ ਲੱਗੀ ਕਲੀ ਨੂੰ ਝਾੜਦਾ ਬੋਲਿਆ
“ਆ ਸਾਲਾ ਕਮਪੁਟਰ ਤੈਨੂੰ ਦੱਸਾਂ ਕਾਕਾ , ਫੇਲ ਹੋਊ , ਜਿਵੇਂ VCR ਹੋਇਆ ਸੀ ਸਾਡੇ ਵੇਲੇ “

ਪਿੰਡ ਦੀ ਸੱਥ ‘ਚੋਂ – 3

ਖਬਾਰ ਫੜ੍ਹੀ ਖੜੇ ਮੁੰਡੇ ਨੇ ਖ਼ਬਰ ਪੜ੍ਹੀ,
“ਸਰਕਾਰ ਪਾਣੀ ਤੋਂ ਬਿਜਲੀ ਬਣਾਉਣ ਲਈ ਉਠਾਏਗੀ ਤਕਨੀਕੀ ਕਦਮ, ਜਗਾ ਜਗਾ ਡੈਮ ਬਣਾਉਣ ਦੇ ਦਿੱਤੇ ਆਦੇਸ਼ |”
ਲੂਣ : “ਲੈ ਬਈ , ਆ ਚੰਗਾ ਪੰਗਾ ਪਾਉ ਹੁਣ, ਮੇਰਾ ਸਾਲਾ ਮੈਂ ਤਾਂ ਧਰਨਾ ਦੇਉਂ ਹੁਣ ! ”
ਘੁੱਦਾ: “ਲੈ ਗਰਮੀਆਂ ‘ਚ ਸੁਖ ਹੋਜੂ ਜੁਆਕਾਂ ਨੂੰ, ਲੈਟ ਤਾਂ ਪਹਿਲਾਂ ਹੀ ਨੀਂ ਆਉਂਦੀ !”
ਲੂਣ ਛਾਤੀ ‘ਤੇ ਹੱਥ ਮਾਰ ਕੇ ਕਹਿੰਦਾ,
“ਜਦੋਂ ਸਾਲਾ ਪਾਣੀ ‘ਚੋਂ ਬਿਜਲੀ ਕੱਡ ਲੀ , ਬਚੂ ਛੁਣਛੁਣਾ ! ”

ਘੁੱਦਾ: “ਚਲੋ ਫੇਰ ਸਰਪੰਚ ਕੋਲ , ਰੱਦ ਕਰਾਈਏ ਆਪਣੇ ਪਿੰਡ ਆਲੀ ਨਹਿਰ ਦਾ ਡੈਮ !”

ਪਿੰਡ ਦੀ ਸੱਥ ‘ਚੋਂ – 2

ਪਿੰਡ ਦੀ ਸੱਥ ‘ਚ ਮੇਰੇ ਪਿੰਡ ਦੇ ਸ਼ੇਰ (ਲੂਣ, ਘੁੱਦਾ ਅਮਲੀ , ਮੁੰਡੀ ) ਪੁਰਾਣੀ ਮਹਫ਼ਿਲ ਅੱਜ ਫੇਰ ਹਾੜ ਦੀ ਧੁੱਪ ਨੂੰ ਮੱਠੀ ਕਰਨ ਲਈ ਬਰੋਟੇ ਹੇਠ ਬੈਠੀ। ਜੱਕੜ ਛੱਡਦੀ ਦੇਖੋ :
ਘੁੱਦਾ ਅਮਲੀ: “ਬਈ ਓ ਪਾੜ੍ਹਾ ਨੀਂ ਆਪਣਾ ? ਪੰਡਤਾਂ ਦਾ , ਜਿਹੜਾ ਏਨਜਨੀਅਰ ਆ ”
ਮੁੰਡੀ : “ਆਹੋ, ਓਹੀ ਆ, ਇਹ ਪਤੰਦਰ ਵੀ ਐਨਕਾਂ ਲਾਈ ਕਿਧਰ ਨੂੰ ਜਾਂਦਾ, ਮਾਰੀਂ ਹਾਕ ਏਹਨੂੰ , ਪੜ੍ਹਾਈ ਦੇਖੀਏ ਪਾੜ੍ਹੇ ਦੀ !”
ਘੁੱਦਾ ਅਮਲੀ: “ਬਈ ਕਾਕਾ, ਕਰਦਾ ਕੀ ਆ ?”
ਪਾੜ੍ਹਾ : “ਤਾਇਆ ਜੀ , ਸੋਫਟਵਯਰ ਬਣਾਉਨਾ ,ਹਰੇਕ ਕੰਮ ਨੂੰ ਆਟੋਮੈਟਿਕ ਕਰ ਦਿੰਦੇ ਆ ਓਹੋ |”
ਲੂਣ : “ਕਾਕਾ, ਮੰਨੀਏ ਤਾਂ , ਜੇ ਇੱਕ ਕੰਮ ਆਟੋਮੈਟਿਕ ਕਰਦੇਂ !”
ਪਾੜ੍ਹਾ : “ਕੀ ਬਾਬਾ ?”
ਲੂਣ , ਹੱਥ ਜਿਹਾ ਫੜ ਕੇ ਪਾੜ੍ਹੇ ਦਾ , ਕਹਿੰਦਾ

“ਆਹ ਜ਼ਰਦਾ ਮਲਣਾ , ਸਾਲਾ ਸਾਰੇ ਹੱਥ ਚਿੱਟੇ ਕੀਤੇ ਪਏ ਆ , ਮੇਰੇ ਸਾਲੇ ਨੇ |”

ਪਿੰਡ ਦੀ ਸੱਥ ‘ਚੋਂ – 1

” ਓਹ ਬਾਬਾ ਕਿੱਦਰ ਚਲਿਆਂ ਐਸ ਵੇਲੇ ” – ਸੱਥ ਚ ਬੈਠੇ ਪੰਮੀ ਨੇ ਕਾਹਲੇ ਕਾਹਲੇ ਤੁਰੇ ਜਾਂਦੇ ਬਚਨੇ ਨੂੰ ਹਾਕ ਮਾਰੀ | ਬਚਨਾ ਸੱਥ ਵੱਲ ਨੂੰ ਮੁੜ ਪਿਆ |
” ਓਹ ਸ਼ੇਰਾ ਪੁਛ ਨਾ ਬਸ , ਆ ਨਿਆਣਿਆਂ ਨੇ ਜਾਨ ਖਾਧੀ ਹੋਈ ਆ ਕੇ ਆਹ ਛਤਰੀ ਜੀ ਲਵਾ ਕੇ ਦੇ , ਸਬ ਦੇ ਘਰ ਲੱਗੀ ਹੋਈ ਆ ” – ਬਚਨੇ ਨੇ ਮੋਢੇ ਟੰਗੇ ਪਰਨੇ ਨਾਲ ਥੜੀ ਝਾੜਦਿਆਂ ਕਿਹਾ |
“ਛਤਰੀ ਕਾਹਦੀ ਟੈਲੀਵੀਜਿਨ ਆਲੀ” – ਇੱਕ ਹੋਰ ਨੇ ਪੁਛਿਆ |
“ਆਹੋ ਏਹੀ ਕਹਿੰਦੇ ਆਪਣੇ ਘਰੇ ਪ੍ਰੋਗਰਾਮ ਘੱਟ ਚਲਦੇ ਆ | ਹਾਲੇ ਤਿੰਨ ਮਹੀਨੇ ਪਹਿਲਾਂ ਕਹਿੰਦੇ ਟੈਲੀਵੀਜਿਨ ਲਿਆ ਦੇ | ਮਸਾਂ ਆੜਤੀਏ ਤੋਂ ਪੈਸੇ ਚਾਕੇ ਓਹ ਲਿਆ ਕੇ ਦਿੱਤਾ ਹੁਣ ਆਹ ਨਵਾਂ ਯੱਬ ਖੜਾ ਕਰਤਾ ” – ਬਚਨੇ ਨੇ ਕੰਧ ਨਾਲ ਢੂੰ ਲਾਉਂਦਿਆਂ ਜਵਾਬ ਦਿੱਤਾ |
” ਏਵੇਂ ਹੀ ਆ ਬਾਬਾ ਨਵੇਂ ਜ਼ਮਾਨੇ ਦਾ ਤਾਂ , ਨਿੱਤ ਨਵੀਆਂ ਚੀਜ਼ਾ ਭਾਲਦੇ ਆ | ਆਹ ਸਾਡੇ ਆਲੇ ਛੋਹਰ ਜੇ ਦੇਖਲਾ, ਸਾਰਾ ਦਿਨ ਡੱਬੇ ਮੂਹਰੇ ਬੈਠੇ ਰਹਿੰਦੇ ਆ ਜਿਵੇਂ ਖਾਣ ਨੂੰ ਨਿਕਲਣਾ ਹੁੰਦਾ ਕੁਛ ਏਹਦੇ ਚੋਂ ” – ਇੱਕ ਹੋਰ ਨੇ ਆਪਣੇ ਘਰ ਦਾ ਹਾਲ ਬਿਆਨ ਕੀਤਾ |
“ਹੋਰ ਗਾ ਭੜਿਆ ਮੇਰਾ ਤਾ ਚਿੱਤ ਟੈਲੀਵੀਜਿਨ ਲੈਣ ਨੂੰ ਵੀ ਨੀ ਕਰਦਾ ਸੀ | ਸੁਣਿਆ ਗੰਦੇ ਮੰਦੇ ਜੇ ਪ੍ਰੋਗਰਾਮ ਆਉਂਦੇ ਆ ”
“ਬਾਬਾ ਤੂੰ ਵੀ ਦੇਖ ਲਿਆ ਕਰ ਵਿੰਦ ਝੱਟ | ਤੇਰਾ ਵੀ ਚਿੱਤ ਖੁਸ਼ ਹੋਜੂ” – ਇੱਕ ਨੌਜਵਾਨ ਜੇ ਮੁੰਡੇ ਨੇ ਟਿੱਚਰ ਕੀਤੀ |
“ਲਗਦਾ ਬਾਬਾ ਤਾਹੀ ਭੱਜਿਆ ਜਾਂਦਾ ਸੀ ਮੰਡੀ ਨੂੰ ” – ਇੱਕ ਹੋਰ ਨੇ ਕਿਹਾ |
“ਨਾ ਓਹ ਮੁੰਡਿਓ ਆਹ ਹੁਣ ਦੇ ਗਾਣੇ ਤਾਂ ਸ਼ੋਰ ਸ਼ਰਾਬਾ ਹੀ ਆ | ਗਾਣੇ ਤਾ ਸਾਡੇ ਵੇਲੇ ਹੁੰਦੇ ਸੀ ਮਾਣਕ ਵਰਗਿਆਂ ਦੇ | 
“ਮਾਂ ਹੁੰਦੀ ਏ ਮਾਂ ਵੇ ਦੁਨਿਆ ਵਾਲਿਓ …….”- ਬਾਬਾ ਗਾਣਾ ਗਾਉਣ ਲਗਿਆ |